04 November 2020
Komisioni i Pavarur i Mediave (KPM) në bashkëpunim me Projektin “Liria e shprehjes dhe liria e mediave (JUFREX 2)” organizuan sot një tryezë diskutimi në formë online, lidhur me Draft-Rregulloren për Pronësinë dhe Koncentrimin e Ofruesve të Shërbimeve Mediale Audio dhe Audiovizuele. Tryezën e moderoi Kryeshefi Ekzekutiv i Komisionit të Pavarur të Mediave z.Luan LATIFI. Pjesëmarrës në këtë tryezë ishin përfaqësues nga KPM, përfaqësuesi i Zyrës së KiE në Prishtinë z.Frank POWER, përfaqësuesi i Zyrës së BE-së z.Dario DI BENEDETTO, z.Jean-Francois FURNEMONT - ekspert i angazhuar në këtë projekt nga Këshilli i Evropës, Asociacioni i Mediave të Pavarura Elektronike të Kosovës (AMPEK), përfaqësues të mediave dhe përfaqësues të operatorëve të shpërndarjes.
Fjalën hyrëse e mbajti Kryeshefi Ekzekutiv z.LATIFI, ku foli për rëndësinë dhe nevojën e avancimit të rregullimit të çështjes së pronësisë së mediave në tregun medial në Kosovë si dhe procesin e punës së hartimit të draftit të Rregullores për Pronësinë dhe Koncentrimin e Ofruesve të Shërbimeve Mediale Audio dhe Audiovizuele.
Në vazhdim të tryezës së diskutimit, pjesëmarrësit patën mundësinë që të paraqesin qëndrimet dhe opinionet e tyre lidhur me draft rregulloren në fjalë si dhe japin komente dhe sugjerime.
Përfaqësuesit e KPM-së dhe eksperti i angazhuar në këtë projekt nga Këshilli i Evropës, paraqitën shembujt nga BE-ja për rregulloren mbi pronësinë dhe koncentrimin e mediave.
Në përfundim të tryezës, pjesëmarrësit u dakorduan që të vazhdohet puna në procesin e finalizimit të draftit të Rregullores për Pronësinë dhe Koncentrimin e Ofruesve të Shërbimeve Mediale Audio dhe Audiovizuele.
Komisionin e Pavarur të Mediave